Чахкля


АдтҌ ё нике эйй ти, мӣ ли тэдт чахкля я куэсь сийй эллмантэсьт йиллин.Нэ а коаля лиййин сийй мугка, - ныдтҌ тула, штэ моаййнсет синэ баййяс вуаййлантнэ элькэшҌ. Са̄рнэт, пэря чахкляя пуквесь мырэсь нике эллий. Йиллин сийй е̄ммьне вульн я тӯлльен пукэ со̄н ва̄птэквудэгойм. А ижя ва̄йвшэнне йӣллин. Синэн ди оаз ниманде эллей. Роаӊӊкен чахкля удць, удця ыгкса парна. Я пӯдзэ синэнҌ лиййен удць. Пынне мушт сӣнэбайяс- е̄ммьне альн кӣрре кӯдъен. Мугка куэссь- лянч чаххклян еммьневуэллэс ва̄рен шэ̄нтэнҌ..
Ляйй, зоабэль, ке̄-ни соа̄мен я сӣвьтэ чахклят, вӯйхэлэ, ва̄птэклувэ сӣн ве̄хкьвудэсь. Куэсь сийй(чахкля) а̄ррьвдэлнен, штэ сӣнэт эйй пӯррь тӯййя, а нюэ̄зесь тӯййя кӣссешь, обижайдэднэнҌ я агкьбайяс тэйй сэен уйднэнҌ.

Вуайй бэдтэ, тэннвуэйке мӣн пайхкен сийй коадтэнҌ, штэ янаш э̄лькен е̄на ыжесь чуэйв я̄нхэллэ. Эввтэль-дэд це̄ӆӆьке»са̄мля» - тэ̄дт ли вӯййксэсь. Ляйй, коаппшэй сыййта пуэдтэв, а са̄мь ке̄сь шылл - саен. Ка̄тсассьтэв коаппшэй та̄вяр, штобэ на̄вьт ев ке̄зьхэлчен, я тӣдтэв: хошш пуэдҌ пэйель ыгь, пугк кӯдтай лыгкхэлмэха. Эйй тула тэдт ляйй. Са̄мь парна чофта шоабшен култэллэ моаййнсэтҌ тэйд удць о̄ллмья байяс-чахкля, когк пугк е̄ммьне ваптэквудэт тӯлльен я е̄ннэт, е̄ннэт ве̄кьхэн. Тэль кохт тэн байяс эфт моайнсэсьт са̄ррнэв.
Чӯйкэ э̄ххьтэшьт ме̄х“цьла та̄лльва саввьхэ альн. Айнхана уйн:талльв кэскэсьт вэзхувма эйй шӯрр пӣввл я вял сӯййн руэнах“т.» Вуайй бэдт, - юрртель со̄н, - ке еммьне вульн я̄лл». Пыййель пельй е̄ммьнье, - ӣнэт куӆӆс, тишш (сыййнэмналль), пӯдзэ хоҏҏкэв. «Я тыста, вуайй бэдтэ, ча̄хкля елсэллэв. Быдач сӣнэ эл выльшхэ!» Ышштэ шӣххтла я эльге вӯррьтэ. Тала кулл:ке̄-лянч со̄н эл ке̄ххч. Коа̄ввэс-чуэнч со̄н эввдэсьт уцьхэнч пальяс оаллмьенч. Ме̄х“цьла ныдтҌ э стуэлльплувэ. А ча̄хкля тӣшшяй мугка: мэ̄нн бэ ме̄х“ьцля эйй лыгк, пугк со̄н мӣлльтэ нуммпаш.
«Тала быдач мынне мугка пэ̄ҏҏьтэ выгкэ, парнат роаммшаххьтэ. Ко̄хт бэ соагкэ со̄н?» - юррьтлувэ ме̄хцьла. Хӣтрэ сон ляйй. Нӯлэ коаммэ(оанҌхесь на̄ввьт са̄хьпе) ко̄рсэгет. Эфт ко̄рсэгк - мо̄джесь, чӯввдэнне поаййнма, - алльтма чахкляя пые, нумбен эльге пырс эжесь кӣссэ. Кӣче со̄н э̄л чахкля, киче, маӊӊа воальтэ ко̄рсэгк я эльге пырс ыжесь нышше кӣссэ. Чахкля пай нуммпшен ,мэн о̄ллмэ лыхкен, - чофта сийй тоаххтен о̄ллмзнҌ пукэ моах“тсэллэ. Штобэ ка̄ннцьвудтэсьт о̄ллмэгойм е̄лле. Тэль я… Кӣсслувэ пугк весь, со̄ррэй,лыгкнассьтэ эйй вуэй. Ме̄х“цьла воальтэ со̄н, пые пуӊӊе я вэххтъя моасст ёдтэй.
ПыдтҌэ ме̄х“цьла эжесь куадта-елемпэ̄ҏҏт мугка, ка̄ххта се̄фьтренҌ я лавьнен, шалаш-налла. Паррна роамгудден, са̄ррнэ ча̄хкля матҌхэв, кӣткмесь сыйпхэв, кӣдэ альн кӯннҌтэв. Са̄мь оассэт сонне кӯррэн. А ча̄хкля нышше старъяд, пугк сӣнэ мӣлльтэ нуммпаш - ох“пнув о̄ллмэй тыгквен тӯет. Нэ тагэсьт пӣдтҌ. Эссвэ тэн са̄мь сыйд э̄л чӯдтҌ- ре̄х“кь са̄ммлят. Пугк оалм олма кадцсэллэнҌ таввгетҌ, эргхахьтымгойм туаррэ элькен, я ча̄х“кля синэгойм. Э̄лькен сон соарнхэллэ луэммэ. А ча̄х“кля эйй куллтэл. Уйнэсь со̄н чӯдҌ я вуэста сийе вӣджель. Тугк со̄н ча̄рвэнҌ чо̄х“кэв, кэлдэнҌ та̄гкэв, а соннҌэ ни ми эйй тэгкьюв. СӯрркнэнҌ чӯдҌ, ЮррьтлэнҌ, штэ тэста ли нуэйдт сайй, вэххтамп поагэ поачкэнҌ. Пугк са̄мь вуэллгэнне коамрэннтэв ча̄х“кляя, пассьпушшэв со̄нне, что пӣсьтэ чӯдесьт.
А ме̄х“цьлая скрудть ко̄ххт-ляннч эйй шӣг шэнндэ. Оккнэ соннэ̄, штэ ча̄х“кля вӯйхэлнэ уййтэдҌ. Воальтэ со̄н,пые пӯӊӊе я ва̄нҌцель тэн поаххк пӣввлэ. Роаммгуде ча̄х“кля, куэсь уйнэсьт роднэ сэет. Лӯшьте са̄мля со̄н е̄ммьне э̄л. Па̄ссьпушш ча̄х“кля ме̄х“цьлая я вӯррьтлэ садга па̄х“к. Ке̄хчь са̄мля, кыфкант. Ляйй ча̄х“кля,-я скрудть эйй шэ̄ннтма. Мэ̄нэ эйй е̄ннэ а̄ййке, - ыдтэй, коалль я сыллп куськет кӣдэнҌ тӯлляй. ЭнҌдэ ме̄х“цьлая я са̄ррн: »АннҌ самь,куэсь сӣнэн нушшь тагас,тӣге по̄дтлэв. Мыйй пай аннҌтэп сиййе тэнн ве̄рьт, е̄ннэ бэдҌсувв». Са̄рнэт, ча̄х“кля кугкь соамет тӯльсэллен, пугкве̄сьт сиййе ве̄кьхен. Тэнн райя, покэ ке-лянч ва̄птэгклуввэ эйй юррьтэшуадда.

Перевод на саамский язык Г. А. Власова    

Популярные сообщения из этого блога

Семилетний стрелок из лука

Саам - богатырь

Гирвас - озеро